Prezident İlham Əliyev Azərbaycanın nəqliyyat potensialına xüsusi diqqət çəkərək əsas prioritetləri qeyd etdi. Bu prioritetlərə Mərkəzi Asiya, Qafqaz və Avropanı birləşdirən dəmir yolu, dəniz və enerji dəhlizlərinin inkişafı daxildir. Dövlət başçısı çıxışında bunun təkcə daxili layihələr deyil, bütövlükdə regionun rifahına xidmət edən genişmiqyaslı fəaliyyət olduğunu vurğuladı.Son illərin ən mühüm nailiyyətlərindən biri Bakı–Tbilisi–Qars (BTQ) dəmir yolu xəttində, xüsusilə Gürcüstan ərazisində yerləşən 184 kilometrlik hissədə infrastrukturun müasirləşdirilməsidir. Azərbaycanın səyləri nəticəsində bu hissənin yükötürmə qabiliyyəti beş dəfə artırılaraq illik 1 milyon tondan 5 milyon tona çatdırılıb. Bu addım əsas tərəfdaşlarla əməkdaşlığın daha da dərinləşməsinə zəmin yaradıb.Bu yaxınlarda “Azərbaycan Dəmir Yolları” QSC ilə “Çin Dəmir Yolları” Dövlət Korporasiyası arasında Anlaşma Memorandumu imzalanıb. Sənəd Xəzər dənizi vasitəsilə konteyner daşımalarının genişləndirilməsini, liman və dəmir yolu infrastrukturunun inkişafını, gündəlik 10 blok qatarın hərəkətini nəzərdə tutur. Bu isə Azərbaycanın Orta Dəhlizdəki mövqelərini əhəmiyyətli dərəcədə gücləndirmiş olacaq.Azərbaycan “Bir kəmər, bir yol” təşəbbüsü çərçivəsində Çin ilə əməkdaşlığı ardıcıl olaraq dərinləşdirir. Prezident İlham Əliyev qeyd edib ki, ölkənin nəqliyyat-logistika infrastrukturu artıq bu genişmiqyaslı layihəyə inteqrasiya üçün tam hazırdır.“Bu istiqamətdə böyük potensial var. Artıq Çinin bir çox şəhərlərindən Azərbaycana və Azərbaycan vasitəsilə Qərbə konteyner qatarları göndərilir. Onların sayı ildən-ilə, özü də onlarla faiz artmaqdadır. Hesab edirəm ki, yaxın gələcəkdə bu rəqəmlər bir neçə dəfə artacaq. Biz Çin Xalq Respublikasının Sədri Si Cinpinin ‘Bir kəmər, bir yol’ təşəbbüsünü əvvəldən dəstəkləmişik və bu təşəbbüs çərçivəsində ölkəmizin ərazisində uyğun nəqliyyat-logistika infrastrukturunu yaratmışıq”, – Prezident İlham Əliyev iyulun 19-da III Şuşa Qlobal Media Forumunun iştirakçıları ilə görüşü zamanı bildirib.

Ruslan Babayev,

YAP Neftçala rayon təşkilatı ərazi partiya təşkilatının sədri